آذربایجان تورک خالقینین ایچنده کؤرپه اوشاقلارلا باغلی گؤزل اینام لار وار ، بو ایناملارین بیر چوخو هله ده خالقیمیزین ایچینده یاشاماق دادیر. بیر نئچه بو ایناملاردان یا دئمک اولار سینامالار و کلثوم ننه سؤزلری کؤرپه اوشاق باره سینده :
-قدیم زامانلار کئچی توکوندن اوشاغا بلک باغی دوزلدرمیش لر کی اوشاق دیسگینمه سین.
-بویلو(حامله) خانیم یوخودا قئیچی گؤرسه اوشاغی قیز دیر آما یوخودا پیچاق گؤورسه بیل کی اوشاغی اوغلان دیر.
-ایده آغاجی گول آچان زامان کؤرپه اوشاغین آیاغی گَلر(اسحال اولار) بونا گؤره گرک دیر ایده گولوندن بیر سالخیم قوپاردیب اوشاغین الینه وئره سن. بو ایشی گؤرسن اوشاق دوزه لر.
-اوشاغین بله گینه بالیخ قولاغی قویارلار کی اوشاغی قره باسماسین.
کؤرپه اوشاغی بیرینجی دفعه چیمیزدیرنده بدنینه دوز سپرلر کی دوزلو اولسون!
-کؤرپه اوشاغین بوش ننلی سین ترپدسن اوشاق سانجیلانیب آغلیار.
-قیرخلی اوشاغین(یاشی قیرخ گوندن آز اولان اوشاق) اوستوندن آتیلمازلار چونکی اوشاق اؤلر.
-قیرخلی اوشاغین یانینا هر کیم گلسه گرک دیر او آدام ائوه گیرمه میش اوشاغی ائشیگه اونون آیاغینا چیخارداسان بو ایش اوشاغین اوستونه گلن سحری و جادولاری باطل ائدر و اوشاق سالیم قالار.
-اوشاغین گؤبیین هارایا آتسان اورا باغلی اولار. معمولا چاربورج خالقی اوشاقلارینین گؤبک لرین مدرسه یه آتارلار کی درس اوخویان اولسونلار.
-بویلو خانیم هر کیمدن تیکه یئسه(بیر میوه یا غذا) اوشاغی اونا اوخشار پس حامله خانیم لار گرک دیر هر آدامین الیندن تیکه یئمه سینلر مخصوصا پیس آدام لارین.
-کؤرپه اوشاغین پئیسه یی دالیندان اؤپسن کوسه ین اولار.
-کؤرپه اوشاغین باشی اوستونه قیچی قویارلار کی جین لر اونا توخونماسین.
-اوشاغی سوپورگه ایله وورسان اوغورو اولار.
-زاهی و سود وئرن خانیمین دؤشو گلسه(ممه سی شیشسه) اونو قورد اَلی ایله دیسگیندیرسن و دؤشونون اوستوندن چالسان دوزلر.
-بیر نفرین اوشاغی پهلوان اولسا گرک دیر جیلی بارماغین سیندیرسین یوخسا اوشاق اؤلر.
قایناق لار :
اوجاق ، چاربورجون سایتی ، کؤرپه اوشاقلارلا باغلی ایناملار
فولکلور خزانه سی ، علی ظفرخواه ، قیرخلی اوشاق