" یاخشی لیغا یاخشی لیق هر کیشینین ایشیدی "
" آتالار سؤزو "
حمید آدلی یوخسول بیر کیشی وار ایدی. بو کیشی نین آلتی خیردا اوشاغی وار ایدی. حمید کیشی هر گون مئشه دن شله ایله اودون گتیریب ساتار ، آلدیغی پوللا اوشاقلارینی یاری قارنی آج ، یاری قارنی توخ دولاندیراردی .
بیر گون حمید کیشی یئنه تئزدن دوردو . ال-اوزونو یودو ، اوتوروب بیر آز چؤرک یئدی ، سونرا دهره سینی ، بالتاسینی گؤتوروب مئشه یه اودون ییغماغا گئتدی. آز گئتدی،چوخ گئتدی ، مئشه نین لاپ قالین یئرینه چاتدی. بیرده گؤردو بیر شئی اود توتوب یانیر. کیشی یاخینا گئدیب گؤردو آلووون ایچینده بیر قوتو وار. بو قوتونون ایچیندن سس گلیر :
- آی آمان ، کؤمک ائله یین ، منی بو آلووون ایچیندن قورتارین !
حمید کیشی چوخ رحملی آدام ایدی . اورگی یاندی. اؤزونو آلووون ایچینه آتیب قوطونو کنارا چیخارتدی. قوتونون آغزینی آچان کیمی ، ایچیندن بیر ایلان چیخیب ، کیشی نین بوغازینا دولاندی ، قیشقیریب دئدی :
- سنی ائله ووراجاغام کی ، پارچا-پارچا اولاسان . کیشی یالواریب دئدی :
- ایلان قارداش ، انصاف ائله ، مروت ائله . من سنی اؤلومدن قورتاردیم ،سنه یاخشیلیق ائله دیم.یاخشیلیغین عوضینی وئرمیرسن-وئرمیرسن ، داهی منی نییه وورورسان ؟ مندن ال چک ، بیر بؤلوک چولما -جوجوغوم وار. اونلاری یئتیم قویما !
ایلان اونون بوغازینی سیخیب دئدی :
- ناحاق یئره منه یاخشیلیق ائله میسن. نییه ، بیلمیردین کی ، بیز نسیل یاخشیلیق قاباغیندا پیسلیک ائلریک ؟ یاخشیلیغین یئرینه سنی ووروب بالالارینی یئتیم قویاجام.
کیشی دئدی :
- آ ایلان قارداش ، گل سن بو داشی اتگیندن تؤک . بو سیری یاخشیلیغین قاباغیندا پیسلیک ائله مه ، عادتینی پوز ، منی وورما .
ایلان دئدی :
- اوز وورما ، سنی ووراجاغام . من قایدانی پوزا بیلمرم . کیشی علاج سیز قالیب دئدی :
- ایلان قارداش ، اوندا آمان وئر ، اوچ شرطه گئدک ، سنده سؤزونو دئـ ، من ده دئییم.
اونلار سنی حاقلی بیلسه لر سؤزوم یوخدور ، ووراسان اؤلرم. ایلان کیشی نین سؤزونه راضی اولدو . کیشی قوتونو دا گؤتوروب ایلان بوغازیندا یولا دوشدو . آز گئتدی ، چوخ گئتدی ، بیر بایقوشا راست گلدی. کیشی بوتون احوالاتی بایقوشا ناغیل ائله ییب دئدی :
- بایقوش قارداش ، بیزیم شرطیمیزی کس. دیء گؤرک ، بو یاخشیلیغین قاباغیندا ایلان منی وورماغا حاقلی دیرمی ؟
بایقوش برکدن اولاییب دئدی :
-البته وورماغا حاقلی دی . سیز اینسان نسلینین یاخشیلیغینین قاباغیندا پیسلیک ائله مک لازیمدیر. سیزدن منیم ده اورگیم یارالیدی . منی قویمورسونوز اولاییب ایسته دیگیم یئرلری خارابا قویام. من داغیدیرام ، سیز تیکیرسینیز . ایلان قارداش ، بونو ائله وورارسان کی ، پارچا-پارچا اولار. ایلان ایسته دی حمید کیشی نی وورسون . حمید کیشی شرطلرینی اونون یادینا سالیب دئدی :
- بیزیم هله ایکی شرطیمیز قالیب ، آمان وئر .
ایلان راضیلاشدی . حمید ایلان دا بوینوندا یولا دوشدو . بیر قدر گئدندن سونرا بیر جاناوارا راست گلدی.
کیشی دئدی :
- آی جاناوار ایله ، بو ایلان آلوو ایچینده یانیردی . من اونون کؤمگینه چاتدیم ، اؤزومو آلووون ایچینه سالیب اونو اؤلومدن قورتاردیم . بو یاخشیلیغین قاباغیندا ایلان دئییر سنی ووراجاغام . سن نه دئییرسن ؟ بو حاقلی دیرمی ؟
جاناوار برکدن اولاییب دئدی :
- البته ، حاقلی دیر . او، سنه بؤیوک خاطر قویوب کی ، هله بو واختا کیمی وورماییب. کیشی دئدی :
+ جاناوار قارداش ، دوز دئمیرسن . مگر یاخشیلیق ائله یه نه پیسلیک ائلرلر. جاناوار دئدی :
+ جاناوار قارداش ، دوز دئمیرسن . مگر یاخشیلیق ائله یه نه پیسلیک ائلرلر. جاناوار دئدی :
- من دوز دئییرم . ایلان اوندان اؤترو حاقلی دیر کی ، بو انسانلاردان منیم ده اورگیم یارالیدی . قویمورلار ایسته دیگیم قویونو ، قوزنو یئیم. منی گؤرنده ووروب اؤلدورورلر.ایندیجه بیر سورویه تپیندیم . چوبان ایتلره " توت " دئدی. بیر تهر اؤلومدن قورتاردیم. داد بو اینسانلارین الیندن. اونلارین یاخشیلیق لارینین قاباغیندا پیسلیک لازیمدیر. ایلان قارداش ، بونو ائله وور کی ، پارچا-پارچا اولسون.
ایلان حمید کیشی یه دئدی :
- ائشیتدین کی ، بودا ایکینجی شرط . ایندی دوش یولا اوچونجو شرطه گئدک.
کیشی ایلان بوغازیندا یولا دوشدو . دره لردن سئل کیمی ، تپه لردن یئل کیمی گئدیب بیر تولکویه راست گلدیلر. کیشی تولکویه باش اَییب دئدی :
- سلام علیکم ، تولکو بابا ، خوش گؤردوک . تولکو یوخاری توللانیب دئدی :
+ علیک السلام ، آی توپ قارا ساققال کیشی ! خوش گلنمیسن ، بئش گتیرمیسن. بو ایلانی بوینونا دولاییب ، عارا بئله گئدیرسن ؟ کیشی دئدی :
- آی تولکو بابا ، بو ایلان مئشه ده آلوو ایچینده یانیردی.من اونون امدادینا چاتیب اؤلومدن قورتاردیم.بو یاخشیلیغین قاباغیندا دئییر " سنی ووراجاغام ". ایندی سن شرطیمیزی کس ، گؤرک بو منی وورماغا حاقلی دیر ، یا یوخ ؟
تولکو برک غضیلندی ، گؤزلرینی بره لدیب دئدی :
+ گؤزونون ایچینه قدر یالان دانیشیرسان . بو یئکه لیکده ایلان هئچ واخت او قوتویا سیغماز. ایلان قارداش ، سن قوتودا ایدین ، یوخسا بو کیشی سنه بؤهتان آتیر ؟
- یالان دئمیر ، من قوتودا ایدیم.
تولکو دئدی :
- سن ده یالان دئییرسن . سن هئچ واخت او قوتویا سیغمازسان . شاهیدینیزی گؤسترین ، شرطینیزی کسیم.
ایلان حیرصله نیب دئدی :
- آ تولکو بابا ، نه شاهید ؟ شاهید بو قوتو.ایسته ییرسن ایچریسینه گیریم ، باخ گؤر سیغیرام، یوخسا سیغمیرام.
تولکو دئدی :
- یاخشی ، اوندا راضیام. اما هئچ عاغلیم کسمیر کی ، سن بو قوطویا سیغاسان . شرطینیزی کسرم ، بو کیشینی بورداجا وورارسان اؤلر. اوچ گوندو کی ، دیلیمه اَت دیمه ییب ، آجیندان قارنیم جور-جور جورولداییر. بیر آز اتیندن من یئیه رم.
ایلان دئدی :
- آ کیشی ف قوتونو یئره قوی.
کیشی قوتونو یئره قویدو . ایلان قوتونون ایچینه گیریب قیوریلان کیمی ، تولکو جلد قوتونون آغزینی اؤرتدو و کیشی یه دئدی :
- آ کیشی ، یاخشیلیغا یاخشیلیق هر کیشینین ایشیدی ، آمما ، یامانلیغا یاخشیلیق هر اؤته نین ایشی دئییل.
فورصتی فووته وئرمه ، بو کافری تئز اؤلدور ، جانین قورتارسین.کیشی او ساهات بیر تونقال اوجاق قالادی ، قوتونو گؤتوروب آلووون ایچینه آتدی . ایلان نه قدر قیشقیردی ، یالواردی ، اونون سؤزونه باخان اولمادی .ایلان قوتو ایله برابر یانیب کول اولدو . کیشی تولکویه دوعا ، آلقیش ائله ییردی کی. بیردن اووچولارین قیی ها قیی سسی ، تازیلارین هوروشمه سی ائشیدیلدی .
تولکو ال-آیاغا دوشوب کیشی یه دئدی :
- آ کیشی ، او اووچولار منی آختاریرلار. من اونلارین الیندن قورتاریب بورایا گلمیشم.سنه یاخشیلیق ائله ییب اؤلومدن قورتاردیم ، یئرینه سن ده منه یاخشیلیق ائله ، منی گیزله.
حمید کیشی فیکرلشمه میش اووچولار گلیب چیخدیلار.تولکو ایشی بئله گؤروب قاچماق ایسته دی. آمما تازیلار امکان وئرمه ییب ، باشینین اوستونو کسدیلر . اووچولار تولکونو دیری توتدولار.
کیشی اووچولارا سلام وئریب دئدی :
- اووچو قارداشلار ، من چوخداندی کی ، بو حیله گر تولکونون دالینجا گزیردیم . آمما کی ، توتا بیلمیردیم . چوخ یاخشی اولدو کی ، سیز اونو توتدونوز. بونو منه وئرین .
اووچولار سوروشدولار :
- تولکو سنین نیینه گرکدی ؟
کیشی دئدی :
- بو تولکو منده تویوق - جوجه قویماییب ، هامیسینی یئییب قورتاریب . ایسته ییرم اونون دریسینی اؤزوم سویام ، ایچریسینه سامان دولدوروب ساخلایام. گونده بیر سیری اونا باخام کی ، اورگیم سویویا.
تولکو حمید کیشی دن بو سؤزلری ائشیدنده بیر آلتدان یوخاری اونا باخیب دئدی :
- آی نامرد اینسان ، حاییف منیم سنه ائله دیگیم یاخشیلیغا. بئله بیلسه یدیم ، هئچ سنی ایلانین الیندن قورتارمازدیم ، قویاردیم ووراردی.
حمید کیشی دئدی :
- چوخ دانیشما. بیر یاخشیلیق ائله ییبسن سه ، مین ده پیسلیک ائله ییبسن. سونرا اؤزونو اووچولارا توتوب دئدی :
- قارداشلار نئچه ایسته ییرسینیز وئریم ، بونون دریسینی سویوب منه وئرین .
اووچولاردان بیری بیچاغینی چیخارتدی. تولکونو یئره ییخدی ، دریسینی بوغازیندان چیخارتماق ایسته ینده ، حمید کیشی دئدی :
- دایان ، ائله سویما !
اووچو دئدی :
+ بس نئجه سویوم ؟
حمید کیشی سوروشدو :
- بیر منه دئیین گؤروم سیز بو تولکونون دریسینه ، بیرده اونو سویماق اوچون چکدیگینیز زحمته مندن نئچه آلاجاق سینیز ؟
اووچو دئدی :
+ اون تومن.
حمید کیشی اون بئش تومن پول چیخاردیب اووچو یا وئردی ، دئدی :
- آل ، بو اون بئش تومن ، سویماق زحمتی ده سیزه قالسین . تولکونو ائله دیری-دیری منه وئرین . بئله لیکله ، منیم اورگیم سویوماز . من گرک اونو اؤز اللریمله دیری - دیری سویام.
اووچولار پولو آلیب گئتدیلر . ائله کی ، گئدیب گؤزدن ایتدیلر ، حمید کیشی تولکویه دئدی :
- تولکو قارداش ، سن منه یاخشیلیق ائله میشدین ، من ده سنین خجالتیندن چیخدیم.
گئت ، یاشا !
بونو دئییب حمید کیشی تولکونو بوراخدی ، اؤزو ده ایپینی آچیب آراسینا اودون ییغماغا باشلادی.
تولکو ده اونا کؤمک ائله دی. حمید کیشی شله سینی دالینا آلیب ائولرینه گئتدی.تولکو ده بالالارینین یانینا قاچدی.
قایناق :
- آذربایجان ناغیللاری (4) ، کؤچورن : علی عبادی