آذربایجان ناغیللاری (1)
کچلین فندی...
کؤچورن : علی عبادی
بیری وار ایدی ، بیری یوخ ایدی. ولی آدلی بیر کچل وار ایدی، بونون واری-یوخ بیرجه داناسی وارایدی.
بیر گون کووخا قونشولاری ییغیب دئدی :
_ گلین گئدک کچلین داناسینی بیر فند ایله کسدیرک ، چوخدان بری دیلیمیزه ات دیمه ییب .
سؤزو بیر یئره قویوب گلدیلر کچلین یانینا دئدیلر :
_ ولی ، گل بیر شئی ائیله یک.چوخدان بری دیلیمیزه ات دیمه ییبدیر ، هفته ده هره اؤز داناسینی کسسین بیرگه یئیک.
ولی نین داناسین کسدیلر ، بئسیریب یئدیلر . ولی بیر هفته گؤزله دی ، هئچ کس اؤز داناسینی کسمه دی. ایکی هفته اوچ هفته ، بیر آی کئچدی کسن اولمادی.ولی باشا دوشدو کی ، بونو آلدادیبلار. دئدی :
_ یاخشی ، گؤرون سیزین باشینیزا نه گتیره جگم.
دانانین گؤنونو گونون آلتینا قویوب قوروتدو ، خیردا - خیردا دوغراییب خورجونا دولدوروب ، ائششگین بئلینه آشیردی ، شهره طرف یوللاندی . ولی گلیب بیر بولاغین باشیندا یاتدی . گئجه سووداگرین کاروانی گلیب بو بولاغین اوستونه دوشدو ،
ولی سووداگره دئدی :
_ سیز مندنن بیراز آرالی اوتورون ، چون کی منیم قیمتلی شئیلریم سنین کی نه قاریشار.
سووداگر فیکیرلشدی کی ، دلی دن دوغرو خبر . گئجه سووداگر کئچلین خورجونو گؤتوروب یئرینه اؤزونون تایلارینی قویدو ، اؤزوده باشلادی یول گئتمه یه . آمما کچل یاتمامیشدی ، گؤزونون اوجویلا باخدی ، سحر آچیلدی. کچل گؤردو کی اونلار گئدیب ، تئز تایلاری ائششگه یوکله ییب ائوه گئتدی .
ائوده آچیب گؤردو کی قیمتلی پارچادی . کچل دئدی :
_ آرواد ، گئت کووخخادان آرشین آل گتیر.
آرواد گلیب کووخادان آرشین ایسته دی ، کووخا دئدی :
_ آرشینی نئیله جکسینن ؟
آرواد دئدی :
_ گچل بیر یوک پارچا گتیریب ، اؤلچه جک.
کووخا آرشینی وئردی ، اؤزوده دالینجا گلدی ، گؤردو دوغرودان دا کچل بیر یوک پارچا گتیریب . کووخا دئدی :
_ آی کچل بو هاردان دوشوب الینه ؟
کچل دئدی :
_ سیز ائله بیلدینیز دانانی کسدیردینیز ، منه ضرر ائله دی . دانانین گؤنونو قورودوب تاغالاق ائله دیم ، سونرا تاغالاغی دوغراییب آپاردیم شهرده بیرینی بیر قیزیل پولا ساتدیم ، بو پارچالاری آلیب گتیردیم.
کوخا بو احوالاتی قونشولارینا سؤیله دی ، قوونشولاری هامیسی دانالارینی کسدیلر ، دریسینی قورودوب تاغالاق قاییردیلار. آپاردیلار شهره ساتماغا ، باشلادیلار شهرده قیشقیرماغا :
_ تاغالاق آلان بیری بیر قیزیل پولا .
بازار آداملاری دوشدولر بونلارین دالینا ، باشلادیلار ال چالیب اویناماغا کی تاغالاغین بیری بیر قیزیل پولا اولار ؟ گؤردولر کچل بونلاری آلدادیب . قاییدیب گلدیلر کی کچلی اؤلدورسونلر. کچل دامدان باخیردی ، کووخاگیل کچلی گؤردولر ، کچل قاچدی چؤلده قونشوسو چوبانین یانینا گئتدی. چوبان دئدی :
_ کچل هارا قاچیرسان ؟
کچل دئدی :
_ پادشاهین قیزینی گوجله منه وئریرلر ، من آلمیرام اونا گؤره قاچیرام.
ایسته ییرسن گل پارتاریمیزی دییشک قیزی سنه وئرسینلر. چوبان پالتارینی کچله ، کچل ده پالتارینی چوبانا وئردی . کووخا گلیب چوبانی کچل بیلیب چایا ایته لدی.
گل سنه کیمدن دئییم کچل دن ، کووخا ائوه گلندن سونرا کچل قویونلاری ائوه گتیردی . کووخا قویونلاری گؤروب دئدی :
_ من سنی چایا آتدیم ، قویونلاری هاردان گتیردین ؟
کچل دئدی :
_ اگر چایا دوشوب دئسن " دریججو " اوندا قویونلار گله جک . من بو قویونلاری چایدان گتیرمیشم .
کووخا دئدی :
_ من چایا دوشوب دئسم دریججو اوندا قویونلار گلر می؟
کچل دئدی:
_ البته
کووخا سحر دوروب گئتدی همین یئره ، اوردا اؤزونو چایا آتدی کی دریججو دئسین ، سودا بوغولوب اؤلدو..... .
قایناق :
- آذربایجان ناغیللاری (1) ، کؤچورن : علی عبادی